2012年10月30日 星期二

Fondant flower cupcake


 




我第一個糖皮花花cupcake前星期已經送出比朋友做生日禮物

朋友話好好味,真係多謝哂

我真係好驚唔好食啊

原先我本來係整12個

但後來第2底蛋糕衰左,加上又唔夠時間

咁我就只係做左6個

我都估唔到自己真係咁有興趣

我見到咁靚的cupcake真係好開心

成日都上網睇下其他人的作品

本地網站睇

外國網站又睇..

仲成日煲youtube學野

又成日蒲書局睇書

我發覺中文出的翻糖書真係好少

外國的cupcake書真係好多好多

我的生活因為蛋糕充實起來

成個人都好似靚左(呢樣我d朋友講架)

又成日出中環complete deelite買材料

complete deelite的店員已經識得我喇(因為我去得好密)

在此,我要多謝blog友Irma的教導

Irma真係教左我好多,又成日解答我的問題,真係好多謝妳啊

另外,我老公一路以來都比左好多意見我

個牛油cupcake食譜我地都試左3個

總之我就好開心啦,多謝哂支持我整餅的人

唔講咁多...睇下相先



牛油蛋糕仔的材料





如果有牛油杯子蛋糕的食譜可以比我呀,我想繼續再試更好的啊





我的工佢枱,個底我加左塊厚的透明膠,響家品店買$17/尺,呢隻膠唔痴糖皮,平靚正



自己打的buttercream




先整左d花花,呢隻花我響Youtube學的





搞惦第一個




完成喇,呢六個cupcake我一共用了4個半小時




入盒就送出喇,朋友好鐘意啊



 






********


我買的fondant係響中環安蘭街complete deelite




門口,我入面無影喇,每位店員都好好人,全部都好肯答問題架

我次次去都見到好多外國人去買野




工具我響返上海街買(平好多),我搵到間全九龍賣得最平的糖皮工具,有興趣知就問我啦

complete deelite我主要係買satin ice的fondant,今次我買左白色,另外果盒係icing要黎溝色用





呢盒gum paste硬身d係要黎做花花





*****

以下係昨天買的

我明天要整個蛋糕同朋友慶祝生日

我諗住整個fondant蛋糕

今次個面我試wilton出的fondant,呢隻係pink色




留返黎下次做cupcake用




complete deelite的cupcake係出名好好味,我買左個黎試下

真係好好食,朱古力buttercream一d都唔會好甜

個蛋糕有d脆脆的朱古力係面,又係好好食

$22/個

 





所以話一定唔好怕羞,同店員傾下計又搵到好野

原來佢地有homemade buttercream賣

呢盒係原味$78

可以放響雪櫃,用的時侯放出黎室溫一個鐘就用得

我整的buttercream太甜真係好難食,我試左佢地呢隻真係好好味

完全同我整的係兩回事


 

 

 
****


呢排響書局買左兩本書



 







呢個係我早幾日跟Irma整的花花夾子








 

 

多謝支持





2012年10月29日 星期一

清蒸蘇鼠斑




呢餐係上週四

全程我自己一手一腳搞惦,唔洗老公幫手

本來老公話唔返黎食我都無諗住煮飯,淨係煲啖湯比佢飲

點知佢5點幾鐘突然話返黎食叫煮飯

我即刻落街市買餸

原先諗住平平地買條黃立倉食

但經過平時買開海魚果檔叫我埋去話有好野益我

佢話條蘇鼠斑剛剛瞓著左15分鐘..$70益我

嘩....我心諗...平時呢條生猛要成3舊水

我見個魚樣真係幾靚仔,$70梗係要買啦

嘩,食完真係正到呢,連老公都讚我買得叻

真係好好食,同新鮮完全無分別

所以話呢,街市買餸買熟哂真係有著數架

D檔主有好野一定益下班熟客仔

老公都話我買D材料通常都係靚架

買D咩都足秤過人,永遠有多無少

D肉檔如果舊肉比得唔靚我...我第二日真係試過走返上去話佢唔好食

佢地整整下怕左我次次都比靚我









煲左青紅羅白排骨頭湯




煲好左拎左一壺比阿媽





買左半斤海蝦$35

老公話半斤都有咁多,梗係啦我金精火眼望住個它闆秤,根住佢頂我唔順最後放多幾隻入去




就係呢條蘇鼠斑剛剛瞓著左老闆益我$70賣左比我,都唔知講咩好,我同老公一路食一路笑





蒸9分鐘剛剛好,呢條魚真係幾好食




豆角炒牛肉

牛肉炒得過火左,UN左少少,下次炒好D





大合照

老公話我煮野叻左


 

2012年10月28日 星期日

海鮮邊爐夜




新鮮滾熱辣,呢餐今晚剛食完

用左唔洗4百元買料

樣樣都好新鮮,響屋企可以慢慢食,好舒服

本來今晚唔煮架,諗住落去鴻星食

諗諗就同老公講,鴻星食都要$6-700

不如去街市買d海鮮黎打下邊爐仲好

5點鐘同老公落街市買料

7點就食得喇





先黎美國桶蠔

呢罐$80,得4只,越黎越貴





豆腐豆卜





少不了開支酒

屋企無咩存貨

焗住開左支三百幾蚊的酒,呢餐酒水最貴




上次睇網友小高話呢d包裝魚皮都幾好

咁呢我見到街市豆腐鋪有得賣,$11蚊包,真係幾好食,又脆又新鮮




經過平時買開的豬肉檔,我話今晚打邊爐買牛肉唔幫襯,老闆係都要醒舊豬潤請我食,真係多謝啊




買左4只賴尿蝦$80,好生猛,好鮮甜




買左盒什餃$30,食唔哂放上冰箱得閒拎黎煮麵




響牛肉檔買的牛頸脊$50,另外深紅色係老闆介紹叫我地試下$10,我鐘意食牛頸脊多D




2隻紅蟹$90,真係好好食,好新鮮D肉實督督,蟹之中我地最愛紅蟹




白菜仔加西洋菜




醬料





番茄薯仔蟹窩,超正




呢隻魚皮真係唔錯

 







食淨一隻食唔哂呀,老公將隻蟹拎左去蒸,放涼後放左入雪櫃,明晚食凍蟹




呢餐老公負責哂洗好哂滾埋個湯底

我坐響到等食咋(當然最後係我洗碗)

一到假期老公都唔係點洗我做,我都好開心喇

今餐食淨左少少野

明晚煮個烏冬搞惦佢

有凍蟹食啊,期待


2012年10月24日 星期三

士多啤梨忌廉蛋糕






我第一次整的忌廉蛋糕送左比我好友

呢個好朋友識左2x年

我地小時候係鄰居

青春期我都係同佢一齊成長

之後出左黎工作我地有幾年無再聯絡

朋友既野,無見幾年都唔會生疏

呢兩年大家又再緊密起來

佢10月中生日

咁我就約佢十月初食飯

我決定親自整個蛋糕同佢慶祝

我仲預早將將蛋糕送到餐廳

食完飯個服務員拎個蛋糕時

見到個老友眼濕濕

當佢知道係我整時...真係好感動

原來能夠親自為好朋友造蛋糕真係好幸福的事

見到佢的表情..又笑又喊...

老友話估唔到我仲記得佢最愛係士多啤梨

個蛋糕真係好好味,士多啤梨又好甜

一切開個蛋糕好香士多啤梨味啊,好正





先整左個海棉蛋糕

呢個係6''模

我第一次焗海棉蛋糕

上網搵左個全蛋法

好在都食得下

下次我會再試下其他食譜




焗好喇,樣子都ok




分開佢兩層




買左盒美國士多啤梨

我一路切一路食左幾粒




今次用左愛護牌忌廉

唔知係咪打發得唔夠耐

真係好瀉

我個蛋糕差d唔能夠完成

忌廉查到好醜樣

最後我當睇唔到個蛋糕照送出





大家睇下d忌廉查得好差,唔理喇,加個生日牌照送




入盒




夜晚到左尖東露天餐廳晚飯




一份羊架

一份意粉




切蛋糕喇

個蛋糕順利送出,真係一額汗,我好驚d忌廉溶





好香士多啤梨味,好友大讚好味

我地食左大半個,另外果d好友拎左回家比honey食




我老公要我整個一模一樣比佢食

真係笑鬼c