我的生鐵鑊

今篇我要介紹我的入廚新拍檔

有人話，女人選鑊好似揀老公咁麻煩

呢句說話一d都無錯

我舊居係用法國特福不鏽鋼鑊

我用左兩年都用唔掂

炒咩都係痴都暈

又難洗

一知道要搬屋我已經決定唔會帶它走

好喇

咁我就開始周圍睇有咩新鑊好用

不鏽鋼、陽極、黑金鋼、五層、生鐵

平有....好貴的又有

又上網睇評語

雖然我樣子仲係好新潮

但實質上我係一個家庭主婦，我真係唔想再選錯鑊

經過一個多月尋找鑊的日子

終於我決定買非常高評價的生鐵鑊

知道自己想要生鐵鑊後

我再上網睇下有無好介紹

發覺有網民推薦上海街區利昌刀庄
果然係好野

我用左隻鑊一星期多d

未痴過，夠鑊氣、傳熱快

以下我會作詳細介紹

包括點樣開鑊

點樣用隻鑊

我唔係專家，但知道搵一隻鑊都幾難

想分享比大家，將來想換鑊都可以參考下

開鑊一d都唔難，我都做到

你一定得




*******





好喇，大家見下隻主角先

呢隻生鐵鑊係響上海街區利昌刀庄
果度有兩位大叔看鋪，去到的時間覺得佢地cool cool地，但原來好好人架

問下佢又會教你點揀，原來打下隻鑊聽下聲都知邊隻鋼水靚，會教埋點開鑊

我呢隻係40cm生鐵鑊

$138

配埋個蓋$70

一套共$208




買左隻鑊返黎未用得架

要用肥豬肉同九菜開鑊

去豬肉檔拎肥豬肉

買熟左的通常唔收錢，你話開鑊佢會送比你

無熟的就買5蚊啦

韭菜買3蚊

韭菜買返黎唔需要洗同切，直接落鑊







一開始

唔需要開火

準備一塊唔要的布

先下多多油

用塊布抹暈鑊面

成隻鑊抹暈油之後就開火

唔好開太大火

中火好喇

下油

我會做兩次以下的開鑊程序

肥豬肉同韭菜分開兩份

先爆肥豬肉

肥豬肉用鑊鏟四圍推

推到成隻鑊都有肥豬肉沾過






見到肥豬肉出油可以下韭菜

不停推韭菜

總之韭菜要響成隻鑊沾過

再炒下

韭菜黑哂喇

呢個時間可以起鑊

用清水過水幾次

用布巾抹乾

呢個時間塊布已經唔黑喇







第2次

重剛才下肥豬肉同韭菜

又係炒到黑哂起鑊

再用清水過水，之後用乾布抹乾

呢個時候開鑊已經完成喇

即時煎隻蛋測試下

已經唔黑喇，開鑊非常成功






又擺幾條菜心試下

我feel到D菜好香

*******


另一日

老公試下炒菜

傳熱好快

好夠鑊氣










加兩粒廖孖記落去炒下

好正啊，夠哂鑊氣

******


另一日

我滾大眼雞湯

先煎魚





用中火好喇




完全唔痴

另一邊

爆下番茄

加糖再炒多陣

煎好魚

轉大火下滾水

再下番茄薯仔粟米



關蓋

唔洗5分鐘已經大滾喇

大滾15-20分鐘已經得喇

下鹽調味已經飲得

條魚無穿無爛食得

 

我的介紹係咪好詳細呢

有好野我當然要同大家分享啦

呢隻鑊真係又平又正

老闆話俊鑊會愈用愈靚

佢提我，生鐵鑊唔用得洗潔精洗

用清水...如果太油就用熱水洗

每次用完都要用布抹乾

如果太耐唔開鑊就得閒用D油抹下隻鑊

好喇，打左好長了

介紹完畢~~