登上人氣話題

昨晚響人氣話題之識飲識食發現自己啊

好興奮

真係多謝哂YAHOO賞識

寫BLOG幾年第一次上精選真係有點興奮

好開心啊

就係栗子忌廉蛋糕令我上榜

多謝大家支持

聖誕糖霜曲奇 icing cookies

今年聖誕節

對於我黎講

係好不可思議

我將會親手整歌曲奇送比我的至親好友

除此之外

因為呢老公公司24號有christmas party

我會整60塊icing cookie送比老公的同事

對於我黎講，係非常不可意議

現在的我，對烘焙係非常熱愛

我從來唔會諗到自己會對呢方面有興趣

人生真係好奇妙呀


*****

呢批icing cookies我花左好多時間練習

由於我係睇書同上網自學

曾經歷不停失敗再失敗

我有諗過唔整喇

是但整返普通cookie送禮算喇

諗諗下都係唔好，買左咁多材料會浪費喇

終於....

我成功喇

我第一批icing cookies出爐喇

我好鐘意呀

有無聖誕氣氛呀?

呢棵聖誕樹我好鐘意

大家係咪覺得我連影相都靚左呢?

咁呢真係要多謝"小高"傳授比我的影相技巧

我都覺得影得幾好，嘻嘻

一男一女，so sweet




我將會有兩隻包裝，呢隻包裝係送比朋友

裡面會有6塊cookies

2塊會係icing cookies，4塊會係杏仁cookies

我發覺朋友話icing cookies太靚唔捨得食

所以我會加幾塊杏仁cookies

睇下塊牌仔

homemade by Mrs Fong

係朋友幫我淘返黎架

呢隻單一塊係送比黎christmas party的老公同事






************


睇下曲奇係點樣誕生

先準備好整曲奇麵團的材料




將材料混合後放入雪櫃雪1hr

之後準備icing

先將糖霜過篩

蛋白

lemon汁

雲尼拿油

加埋顏色就ok喇





麵團雪硬左就開始印模喇

搞惦就入爐喇





cookies出爐喇

開始填色lu




呢批係第一日做得成功，所以其實都係剛好合格




呢兩粒靚d




包裝左都唔錯






第二日我再整

cookies同埋icing都係之前果日的，我放左入雪櫃

第2日整都可以呀




先畫好外框，要乾左先再填色




中間果d粒粒係糖粒




 一男一女，好得意呀




到聖誕樹

都係先畫左外框

外框乾左再填色





加埋糖粒就靚哂喇






*********

大家再睇下我第一次整的作品

準備填色

好肉酸呀

所以話呢..不要怕失敗啊

 

 

 

再重溫一下我的靚靚作品

 

我相信我會不斷進步

遲下的作品一定會更靚

 

 

*以上曲奇我係跟"小本廚房"書整的^^*

 

 

原粒杏仁香酥曲奇

上星期六同老公一齊去探朋友的初生兒

咁BB呢當然會有禮物啦(節現最實際)

至於媽咪呢我知佢好鐘意食曲奇

又好鐘意食杏仁

呢款曲奇就啱哂佢

當天去到佢屋企

原來屋入有成十個人

當中3個小朋友仲搶住食

真係開心C我

食譜係小高提供，有興趣去小高度睇食譜啦 食譜按此

當天人人食過都大讚好味

又酥又脆，我唔係好食曲奇一出爐已食了兩塊

唯一係牛油唔夠香，出唔到牛油的香味

下次要用返法國牛油再整過

仲有呢我頭尾浪費了好多

所以我出爐只有二十多塊係見得人

主人家唔多夠食下次要補數

最可惜係我老公唔LIKE食杏仁

佢只係食了一塊咋

但老公見大家都喜歡我整的曲奇佢都好開心

叫我下次整提子曲奇比佢食

在此再一次謝謝小高提供一個咁正的曲奇食譜






呢包杏仁響藥材鋪買，好大包




準備好哂先開始喇

隻手肥淋淋，過程我無咩影相

轉眼間切好一塊塊準備入爐喇

我分了兩底入爐

出爐喇，放涼中

原先我有考慮過用靚靚鐵的曲奇盒

要成$30/個

幾乎仲貴過我D材料錢

我相信朋友都覺得唔需要花錢在包裝上

最後我決定用膠盒

再將曲奇放上平時整CUPCAKE的紙上

我覺得又整齊又美觀

就係呢隻盒喇，$18/10個

以後送禮入盒就靚哂又低成本

 

心思思好想又開爐喇

士多啤梨乳酪芝士凍餅

成十日無寫blog

要快快手追下blog先

事關前星期即興去左澳門睇賽車都未寫

要加油先得

呢個凍餅無上星期整

我諗住係4個女仔食就唔用忌廉

用乳酪加上creamcheese仲有新鮮士多啤梨果肉製成

餅底就用左消化餅碎

其實我完全唔滿意呢個蛋糕

因為creamcheese我打得唔溶，唔夠滑身

再加上餅面好明顯睇到creamcheese有白色一粒粒

不過.....個蛋糕好受歡迎

朋友大讚好清新好好味

成個cake清哂

喜出望外

我都好開心





響心甜買的creamchesse

呢度有1kg，分3次用

美國士多啤梨

原食譜係原味乳酪，我改左用士多啤梨味

消化餅碎我買現成，因為比自己打的更幼細(一句講哂我"懶")




材料準備好喇




先隔水溶牛油整餅底




煮好牛油就撈落餅碎

準備好模具，底部用錫紙包好

呢個細係整比老公

壓好餅碎就放入雪櫃15分鐘雪實




將士多啤梨打成茸

隔水煮魚膠粉

留起少少果肉放入蛋糕

creamcheese加糖打至滑身

因我第一次整，我唔滿意今次打的creamcheese

加入乳酪拌勻




再倒入士多啤梨茸及魚膠水拌勻

之後再加入士多啤梨果肉

拌勻後倒入模中, 放進雪櫃雪至硬身

我呢個係成品，我雪左過夜

我唔滿意餅底做得太厚

餅的四周用上現成的白朱古力圍著

原意係我唔滿意餅底太厚想轉移視線

咁餅面我就想清d，不作多餘的裝飾

士多啤梨乳酪芝士凍餅

食譜 6"蛋糕模

材料 :  

消化餅碎100g,溶牛油50g  (先做好餅底放入雪櫃雪實)

忌廉芝士 250 g, 砂糖 70 g, 士多啤梨乳酪 150g (1杯), 士多啤梨果茸 100g, 魚膠粉 8 g, 室溫水 48g, 士多啤梨切細粒備用(可隨意/可加可不加)

做法 :

1. 士多啤梨攪拌成茸備用
2. 魚膠粉+水, 坐熱水煮至透明備用
3. 忌廉芝士加糖攪拌至滑身
4. 加入士多啤梨乳酪拌勻
5. 再倒入士多啤梨茸及魚膠水拌勻
6. 再加入士多啤梨果肉
7. 拌勻後倒入模中, 放進雪櫃雪至硬身

餅面可隨意裝飾


食譜改至煮意天地